Қазақстанның Ауыл шаруашылығы министрі Айдарбек Сапаров Қытайдың Қазақстандағы Төтенше және Өкілетті Елшісі Чжан Сяомен кездесу өткізді.

Әңгіме барысында министр ауыл шаруашылығындағы ынтымақтастық Қазақстан мен Қытай арасындағы қатынастардың маңызды аспектісі екенін атап өтті. Екі ел арасындағы ауыл шаруашылығы өнімдері бойынша сауда-саттықтың артуы осының айқын дәлелі.  

Мәселен, 2023 жылы ауыл шаруашылығы өнімдерінің айналымы 1,6 есеге өсіп, 1,3 миллиард доллардан асқан. Бұл жерде атап өтетін жәйт соңғы жылдары Қытайда органикалық және экологиялық таза қазақстандық ауыл шаруашылығы өнімдеріне сұраныс артып келеді. Қорыта айтқанда 2023 жылы Қытайға ауыл шаруашылығф өнімдерін экспорттау шамамен 2 есе өсіп, 1,01 миллиард долларға жеткен.