პირველად ყაზახეთში თურქულმა კომპანია GenGroup Qazaqstan-მა ბანანის მოყვანა დაიწყო. ინფორმაციას ყაზახეთის სოფლის მეურნეობის სამინისტროს პრესსამსახური ავრცელებს.

ბანანებს ქვეყნის სამხრეთში, თურქესტანის ოლქში გააშენებენ. სამინისტროს ცნობით, „ოლქში თურქულმა კომპანია GenGroup Qazaqstan-მა 5,3 ჰექტარ ფართობზე ბანანის ხეების სათბურების კომპლექსი ააშენა, სადაც ბანანის წარმოება სამრეწველო მასშტაბით მოხდება.“

უწყება აცხადებს, რომ „ბანანის ჯიში სპეციალურად იქნა გამოყვანილი და ყაზახეთის კლიმატური პირობებისთვის იქნა ადაპტირებული.“ უახლოეს მომავალში სათბური კიდევ 5 ჰექტრით გაფართოვდება, რაც წელიწადში, დაახლოებით, 1000 ტონა ბანანის წარმოების რესურსს გააჩენს.

პირველი მოსავლის აღება 6-8 თვეში იგეგმება. სათბურებში, ეგზოტიკური ხილის გარდა, პომიდორი და მარწყვიც გაშენდება.

პროექტის ღირებულება პირველ ეტაპზე 4 მლნ დოლარს შეადგენს.

სამინისტროს ცნობით, მშენებლობის დროს თურქულმა კომპანიამ მაღალი სიმტკიცის კონსტრუქციები გამოიყენა, ხოლო სათბურები კლიმატ-კონტროლითა და ადაპტური კვების სისტემით აღიჭურვა. ეს სისტემა საშუალებას იძლევა, ყველაზე არახელსაყრელი ამინდის პირობებშიც კი მცენარეების გენეტიკური პოტენციალი სრულად გამოვლინდეს.

[BPN]