Samarqand ilmiy-tajriba stansiyasi olimlari tomonidan O‘zbekistondagi eng shirin pomidor navi yaratildi. Bu haqda Qishloq xo‘jaligi vazirligi axborot xizmati xabar berdi.

Xabarga ko‘ra, Qishloq xo‘jaligi vazirligi huzuridagi Sabzavot, poliz ekinlari va kartoshkachilik ilmiy-tadqiqot institutining Samarqand ilmiy-tajriba stansiyasi olimlari tomonidan pomidorning mahalliy “Mustaqillik- 28” yangi navi yaratildi. Tomchilatib sug‘orish yo‘li bilan yetishtirilgan ushbu nav tashishga chidamliligi, eksportbopligi va hosildorligi bilan ajralib turadi.

Olimlar yaratgan yangi navning shirinlilik darajasi 7 foizga teng va bu ko‘rsatkich mamlakatda yetishtirilayotgan eng shirin pomidorlar ichida rekord ko‘rsatkich hisoblanadi.

Mahalliy “Mustaqillik- 28” navli pomidor ham yuqori hosildorligi bilan ajralib turadi. Bir gektar maydonda ekilgan oddiy navli pomidordan o‘rtacha 40-50 tonna hosil olinsa, mahalliy “Mustaqillik- 28” yangi navidan 150-200 tonnagacha hosil olish mumkin. Bir tup oddiy pomidor 15-20 dona hosil bersa, olimlarning mehnati samarasi bilan yangi nav 50 donagacha hosil beradi. Yana bir yaxshi xususiyati ushbu pomidor hajmi, terisining kerakli miqdorda qalinligi, suvliligi va o‘ta shirinligi bilan ajralib turadi.  Shuningdek, ushbu nav bir bor ekilganda to‘liq pishib yetiladi va 90 foiz mahsulot birinchi va qolgan 10 foiz mahsulot ikkinchi terimda yig‘ib olinadi.